LECTURAS COMPARTIDAS

Ola, amiguiños e amiguiñas!

Estes últimos días de clase as temperaturas están sendo moi altas, verdade? E que mellor forma de facerlles fronte pode existir que descansar á sombra das árbores cunha boa lectura? Así o fixemos estes últimos días, realizando lecturas compartidas en grupos, na zona verde do patio.

Os nenos de Ed. Infantil puideron desfrutar de grandes clásicos como Cocorico, A toupiña que quería saber quen lle fixera aquilo na cabeza ou Chibos chibóns.

Os nenos de 1º e 2º de Ed. Primaria decubristes lecturas máis refrescantes, sobre o verán, como a do conto "O ladrón de Sol", onde esquío e paxaro van descubrindo moitas cousas sobre a estación do verán.

Sen dúbida foi unha actividade moi gratificante, na que o alumnado dos cursos máis altos tamén desfrutou moito, léndovos historias moi divertidas.

Aquí vos deixo un pequeno recordo destes últimos días, nos que fixemos as lecturas compartidas:

E con isto, despídome por este curso. Recordade que vos vou estar esperando na biblioteca o próximo curso! Pasade unhas boas vacacións!!

Ata o próximo curso!

Unha aperta grande,

Frailiño🐭

APADRIÑAMENTOS E AMADRIÑAMENTOS LECTORES DO CLUB DE LECTURA

Ola amiguiños e amiguiñas!

Hoxe veño a contarvos que o Club de lectura, levou a cabo varios apadriñamentos e amadriñamentos lectores na hora de ler, na zona verde do patio. Nesta actividade leron en varios grupos os contos: "Marosa e Mariña camiñan a Compostela" e "Bo camiño, Valentiño", dous álbums ilustrados moi interesantes e centrados no Camiño de Santiago, temática central do Club de Lectura.

Foi unha experiencia moi positiva e gratificante. A continuación deixovos algunhas fotos deste experiencia:

Frailiño 🐭

ACTIVIDADES FINAIS DO CLUB DE LECTURA

Ola amiguiños e amiguiñas!

Os dous libros seleccionados para os dous grupos do Club de lectura, veñen de rematar a súa lectura. Por iso, na xuntanza do club de lectura desta semana, centráronse en reunirse a falar, razonar e analizar todo o visto. 

No Grupo 1 levouse a cabo a actividade "Unha palabra e un motivo". Cada participante escolleu unha palabra representativa da lectura e explicou o motivo da súa elección. As reflexións quedaron recollidas en post-its colocados sobre a mascota da biblioteca, formando unha nube colectiva de emocións e impresións arredor do libro.

                     

O Grupo 2 realizou unha valoración final da obra leída mediante a gravación de podcast na radio escolar. O alumnado preparou previamente o guión, organizou as intervencións e compartiu recomendacións, opinións e reflexións persoais sobre a experiencia lectora, desenvolvendo así a competencia comunicativa e dixital.

FESTIVAL OS MAIOS E AS LETRAS GALEGAS

Ola, amiguiños e amiguiñas!

Hoxe quérovos falar dunha actividade marabillosa que celebramos hoxe no cole… e na que participastes moi animados: o festival relizado na zona verde do patio.

Este mes estivemos traballando as Letras Galegas e coñecendo a autora homenaxeada: Begoña Caamaño e hoxe demostrastes cantas cousas aprendistes sobre ela.

O alumnado de primaria elaborou unhas regueifas moi fermosas sobre a lingua galega e o noso colexio que estiveron preparando durante semanas e hoxe recitaron para comezar o festival.

Ademais, varios alumnos/as de toda a etapa de primaria, de forma voluntaria, prepararon varias cancións en galego para cantar e acompañar coa pandeireta, foi marabilloso vervos e escoitarvos!

O alumnado de 3º e 4º de primaria cantaron ao unísono a fermosa canción "Begoñísima", sobre a escritora Begoña Caamaño. Aínda sigo repetindo o retrouso: "Ai Begoña, compañeira, muller libre e feminista..."

Para rematar, o alumnado de Infantil interpretou e bailou moi ben a canción de broche final do festival. Foi unha tarde chea de música, moito ritmo e co galego por bandeira! Encántame ver o participativos que sodes!

Espero que sigades facendo actividades tan fermosas!!

Unha aperta enorme,

Frailiño 🐭

FIN DE LECTURAS

 Ola amiguiños e amiguiñas!

As aventuras da cuadrilla e das formig4s chegaron ao seu fin e nos clubs de lectura quedaron con moi boas experiencias sobre elas. Foron do seu interese, entretidas, dinámicas... e ademais aprenderon moitas cousas novas sobre o camiño de Santiago e a propia experiencia de facer o camiño.

Para rematar a aventura, podedes ver aquí o reto final do último capítulo do libro do Grupo 2: 

TEMA DO MES: EUROPA

 Comezamos o mes do día de Europa e na nosa biblioteca atopamos moito material desta temática

RECTA FINAL NO CLUB DE LECTURA

Ola amiguiños e amiguiñas!

O grupo 2 do Club de lectura está rematando o seu libro de lectura. Na sesión desta semana, enfocáronse no capítulo 9 do libro e tiveron que facerlle fronte a retos deste tipo: 

BUZÓN DE PETICIÓNS E SUXERENCIAS

Ola, amiguiños e amiguiñas!

Hoxe veño contarvos unha novidade que me fai moitísima ilusión!

Na nosa biblioteca apareceu un novo elemento... un fermoso buzón de madeira que foi creado co material de Polos Creativos do colexio. Agora será o encargado de gardar todas as vosas ideas para facer da biblioteca un lugar aínda mellor.

E... para que serve este buzón? Moi fácil! Se hai algún libro que vos gustaría ler e aínda non temos, ou se se vos ocorre algunha idea para mellorar a biblioteca, podedes deixarma escrita.

Dentro da biblioteca atoparedes unha caixa chea de anacos de queixo de papel 🧀. Collédeo, escribide nel a vosa petición ou suxestión e, cando rematedes, só tedes que depositalo no buzón, que está situado fóra, ao lado da porta de entrada da biblioteca.

 

Prometo revisar todas as mensaxes con moita atención. Quen sabe... igual grazas ás vosas ideas pronto chegan novos libros ás estanterías ou aparecen sorpresas na biblioteca!

Así que xa sabedes: cada anaco de queixo é unha oportunidade para facer medrar este recuncho tan especial entre todos e todas.

Anímovos a participar! Estou desexando ler as vosas mensaxes! 🐭💛

Unha aperta grande,

Frailiño 🐭

FEIRA DO LIBRO - CULTIVANDO LECTURAS

Ola, amiguiños e amiguiñas!

Hoxe quérovos falar dunha actividade marabillosa que celebramos no cole… e na que participastes moi activamente, axudando a manter viva a miña biblioteca e enchendo de cor e alegría o noso xardín.

Con motivo da celebración do Día do Libro, o pasado 23 de abril, organizouse unha feira do libro moi especial, na que o alumnado de Ed. Infantil e Ed. Primaria foi protagonista. Nesta xornada, os nenos e nenas puidestes levar libros para as vosas casas a cambio dunha planta, contribuíndo así ao coidado e atención do xardín escolar.

A actividade, aberta a toda a comunidade educativa, contou tamén coa participación de numerosas familias, que se sumaron a esta iniciativa e compartiron a xornada con nós.

 

A feira completouse con diversas propostas lúdicas e creativas: un mural, zona de manualidades, espazo de estampación e pintura, zona de construción, así como un recuncho para fotografías. Todas estas actividades permitiron gozar dunha mañá dedicada á lectura e á natureza, fomentando ao mesmo tempo hábitos lectores e a conciencia sobre a importancia de coidar o medio no que vivimos.

 

Comparto con vós a continuación un pequeno vídeo resumo desta xornada, que reflicte o bo ambiente creado e a participación de toda a comunidade educativa.

 

Felicítovos pola vosa participación e entusiasmo! Ata a próxima aventura lectora! Sigamos mellorando o noso colexio xuntos!🌼🌱🌷🌸

Unha aperta enorme,

Frailiño 🐭

INMERSOS NA LECTURA

Ola amiguiños e amiguiñas!

Comezou xa a última avaliación deste curso pero as lecturas non rematan aínda.

No Club de lectura seguen moi centrados e metidos nas súas respectivas historias. O grupo 2 tivo que enfrontarse nesta nova xuntanza a outros rectos lectores cada vez máis complexos. Aquí podedes ver en que consistían: 

PREPARANDO... FEIRA DO LIBRO "CULTIVANDO LECTURAS"

Ola, amiguiños e amiguiñas!

Hoxe quero pedirvos a vosa colaboración, xa que estamos organizando a primeira Feira do libro do noso colexio. A idea naceu da necesidade de darlle vida a un montón de libros que levan tempo en desuso e tamén da falta de atención ao noso xardín. Por iso, ocorreusenos o seguinte: un intercambio dunha planta por 3 libros, que levaríades para a vosa casa.

Aquí tedes a información desta actividade, que se levará a cabo o 23 de abril, coincidindo co día do libro:

Este é o cartel oficial da Feira do libro "Cultivando lecturas". Animádevos a participar!!

Unha aperta grande e... vémonos na Feira do libro!

Frailiño 🐭

NOVIDADES DE ABRIL

 Ola, amiguiños e amiguiñas!

Hoxe comparto con vós as novidades do mes de abril. Estiven buscando… e atopei libros e revistas moi interesantes que xa están preparados para que os leades! Mirade que boa pinta teñen!

🌱 Primeiros lectores:

• “Patas arriba”: un álbum moi divertido, con ilustracións cheas de animais e situacións sorprendentes que fan rir e observar con atención.

🌼 Lectorado autónomo:

• “Rondas de Rodari”: un libro con textos inspirados no mundo imaxinativo de Gianni Rodari, ideal para quen xa le con soltura e quere gozar de historias creativas e orixinais.
• Revista “O Papagaio: Cans espaciais en alerta!”: unha revista moi colorida e entretida, perfecta para ler pequenas historias, xogos e ilustracións moi chamativas deste mes de abril.

🌳 Lectorado experto:

• “Elas”: un libro moi especial, con ilustracións fermosas, que nos leva a reflexionar sobre a natureza e os animais dun xeito profundo.
• “Pantera”: unha revista chea con historias cheas de emoción e misterio, con ilustracións envolventes, perfecta para lectores que xa buscan relatos máis intensos.

Como vedes, este mes a biblioteca está chea de novidades para todos os gustos e idades. Eu xa lles botei un ollo a todos… e custoume marchar de alí! 😉 Cal ides escoller primeiro?

Ata a próxima visita á biblioteca!

Unha aperta grande

Frailiño 🐭

LETTERING NO CLUB DE LECTURA

Ola amiguiños e amiguiñas!

O grupo 1 do club de lectura estase iniciando no lettering, comezando con palabras relacionadas co libro de lectura "A cuadrilla de Castro Rosa". Para iso están utilizando uns rotuladores especiais, con efecto dobre cor e facendo moitas probas. Aquí van os primeiros borradores realizados con esta técnica:

TEMA DO MES

Ola, amiguiños e amiguiñas!

Estrenamos tema do mes… a primavera! 🌸🌼 Un tempo cheo de cor, flores e días de sol e chuvia, que tamén chegan a nosa biblioteca en forma de libros moi especiais. Seleccionei para vós historias moi diferentes, de distintos tipos e en varias linguas.

🌱 Primeiros lectores:

• “Flores”: un libro moi visual e sinxelo, perfecto para comezar a recoñecer palabras e imaxes.
• “Álbum de bichos”: ideal para observar insectos con textos curtos e repetitivos.
• “Ha llegado la Primavera”: un álbum ilustrado que explica os cambios da primavera de forma clara e alegre.
• “O ladrón de flores”: un conto divertido e fácil de seguir, con un pequeno misterio nun xardín.

🌼 Lectorado autónomo:

• “Un día de chuvia e flores”: un álbum ilustrado con moita sensibilidade, que combina texto e imaxe para contar unha historia chea de emocións.
• “Poemas de flores y abejas”: poesía sinxela para iniciarse no mundo dos versos coa temática da primavera.

🌳 Lectorado experto:

• “Arbolidades”: un libro de poesía que xoga coas palabras e invita a pensar e imaxinar.
• “Verdedades”: unha proposta poética que mestura texto e ilustración para reflexionar sobre a natureza.

Como vedes, a primavera tamén se le… e na biblioteca hai libros para todos os niveis lectores, dende os que estades empezando ata os que xa sodes expertos lectores.

Cal será o voso favorito? Eu sigo dubidando… son todos marabillosos! 🌷

Ata a próxima aventura entre libros!

Unha aperta grande,

Frailiño 🐭

SEMANA DA PRENSA

 Ola, amiguiños e amiguiñas!

Son Frailiño, o voso ratiño da biblioteca 🐭📰, e hoxe veño contarvos un resumo dunha semana moi especial no noso cole… a Semana da Prensa!

Durante estes días convertéstesvos en auténticos xornalistas e, entre todo o alumnado, creastes un xornal moi orixinal chamado: QUE PASA EN SOBRADO?

Cada curso tivo unha misión moi importante neste gran traballo en equipo. Os máis pequechiños de Educación Infantil comezastes a aventura sacando fotografías de traballos e espazos novidosos do cole. Vaia ollo que tedes para descubrir cousas interesantes!

Despois, en 1º de Educación Primaria encargástesvos de escribir os titulares das noticias, eses que chaman a atención e nos fan querer seguir lendo. En 2º de Primaria déstedes un paso máis creando os subtítulos, completando a información inicial.

O alumnado de 3º e 4º xa vos puxestes máis serios e comezastes a redactar as noticias, respondendo ás preguntas máis importantes: QUE pasou e QUEN participou.

E para rematar este gran xornal, os maiores de 5º e 6º de Primaria completastes o traballo engadindo máis detalles, respondendo a ONDE, CANDO e POR QUE sucederon as cousas.

Aquí está a vosa creación, o xornal do colexio:

QUE PASA EN SOBRADO?

Grazas ao esforzo de todos e todas, conseguimos crear un xornal único, cheo de información interesante sobre o noso cole. Eu, dende a biblioteca, non podía deixar de lelo unha e outra vez!

Parabéns, pequenos e pequenas xornalistas! 🐭✨

Ata a próxima historia!

Unha aperta grande,

Frailiño

MÁIS RETOS A RESOLVER NO CLUB DE LECTURA

Ola amiguiños e amiguiñas!

Os nenos do grupo 1, de 3ºe 4º, seguen lendo sen parar, na súa aventura do camiño de Santiago entre liñas. Están vivindo todo tipo de aventuras en cada capítulo, ante unha nova etapa da cudarilla.

O alumnado do grupo 2, de 5º e 6º, continúa tendo novos retos que superar, está sendo toda unha aventura!! Desta vez versan sobre os capítulos 5 e 6 do libro de Formig4s. Aquí podedes ver o que tiveron que superar nesta reunión do club de lectura: 

NOVIDADES DE MARZO

Ola, amiguiños e amiguiñas!

Acaban de chegar a nosa biblioteca as novidades do mes de marzo. Xa vedes que non paramos de encher as estanterías con historias divertidas e emocionantes! Estiven mirando con calma todos estes libriños… e aquí vai a miña organización segundo o voso momento lector:

🌱 Primeiros lectores

• “Álex ten vergoña”: un álbum ilustrado moi especial que fala das emocións, neste caso da vergoña, axudándonos a comprendela mellor cunha historia tenra e próxima.

🌼 Lectorado autónomo: 

Este mes chegaron varios libros da colección de cómic Bitmax&Co, que tanto vos gusta.

• “Supercerdo”: un porquiño moi valente que vive aventuras cheas de humor.
• “El dragón de oro”: unha historia con dragóns e acción, moi entretida.
• “Paolo, el perro pastor”: un can traballador que nos ensina o valor da axuda.
• “¡Salvemos a Ewo!”: unha misión chea de amizade e colaboración.
• “¡Garfunfel en directo!”: espectáculo e risas nunha aventura moi divertida.
• “La fiesta de Areta”: unha celebración con moita alegría e compañeirismo.

🌳 Lectorado experto:

• Revista “O Papagaio: O planeta é violeta (8 de marzo)”: unha revista moi interesante que este mes trata temas como a igualdade, con información, cómics e propostas para reflexionar e aprender máis.

Como vedes, este mes temos lecturas para rir, para emocionarnos e tamén para pensar un pouquiño máis. Cal vos apetece levar para casa? Eu xa teño unha pequena montaña preparada! 😄📚

Ata a próxima aventura!

Unha aperta grande,

Frailiño 🐭

CLUB DE LECTURA... SEN PAUSA!

Ola, superlectores!

No Club de lectura atópanse totalmente inmersos nas historias dos seus libros, pero aínda así, teñen tempo a facer outras actividades moi especiais. 

O alumnado do grupo 1, creou un mural colaborativo con debuxos e adaptacións das personaxes do seu libro. Mirade que creacións fixeron: 

Ademais, aquí tedes os retos que tiveron que resolver no grupo 2, sobre os capítulos 3 e 4 do libro:

Como vedes, a dificultade vai en aumento!!

Unha aperta, 

Frailiño
 

DÍA DE ROSALÍA

Ola, amiguiños e amiguiñas!

Hoxe quérovos falar dunha actividade moi especial que fixestes no cole… e que eu estiven observando con moita atención dende o meu recunchiño.

Para celebrar o Día de Rosalía de Castro, todo o alumnado participou na creación duns murais colaborativos cheos de arte e cor. Cada curso puxo o seu gran de area para conseguir un resultado final moi fermoso.

Inspirástesvos nunha técnica moi chamativa, ao estilo de Andy Warhol, pintando a cara de Rosalía con cores diferentes e moi vivas. Cada grupo fixo a súa versión, e quedaron unhas composicións súper orixinais e alegres.

Ademais, enchestes os murais de rosas moi bonitas, dándolle un toque aínda máis especial. E sabedes que máis me gustou? Que os cursos máis altos de primaria escribistes poemas, que logo se engadiron aos murais. Así, mesturastes arte e poesía para renderlle unha homenaxe moi completa a Rosalía.

Grazas ao traballo en equipo de todos e todas, o colexio encheuse de cor, creatividade e moito sentimento. Eu, como bo rato de biblioteca, estou encantado de ver canto aprendestes e o ben que o fixestes!

Parabéns polo voso traballo! Ata a próxima aventura lectora!

Unha aperta grande,

Frailiño 

NOVA SECCIÓN NA NOSA BIBLIOTECA: O CAMIÑO DE SANTIAGO

 Bo día, superlectores!

Como este curso estamos investigando e explorando no tema do camiño de Santiago, xa que tamén participamos no programa "Vexo, veo Xacobeo", contamos na nosa biblioteca cunha nova sección dedicada en exclusiva ao Camiño de Santiago.

Contamos con moito material variado: álbums ilustrados, contos, novelas, libros de teatro, libros informativos, folletos, libros de fotografías.... e tamén varios xogos de mesa. Espero que vos gusten moito e que sigamos aprendendo moito máis sobre o camiño!

MARCAPÁXINAS PERSONALIZADOS NO CLUB DE LECTURA

Ola amiguiños e amiguiñas!

O Club de lectura está avanzando moito nas súas lecturas e por iso xurdiu a necesidade de utilizar un marcapáxinas, para non perderse. E que mellor idea que ter un marcapáxinas personalizado, propio do club de lectura?? Aquí tedes os bocetos creados, cos logotipos do grupo 1 e 2 e abaixo, as creacións que fixeron todos os participantes no club de lectura, na outra cara do marcapáxinas.

Canta creatividade!! Son uns marcapáxinas moi orixinais! Seguide facendo actividades tan divertidas no Club de lectura.

Unha aperta,

O rato Frailiño🐭

TEMA DO MES

 Bo día, superlectores!

Para desfrutar desta estación e poder acompañala cunha boa lectura, contades cunha selección de material na biblioteca, que seguro que vos vai encantar.

RETOS DO GRUPO 2 DO CLUB DE LECTURA

Ola amiguiños e amiguiñas!

No grupo 2 do Club de lectura tocoulles superar uns retos moi inxeniosos, relacionados cos dous primeiros capítulos do libro que están a ler: Formig4s. Misión Camiño de Santiago.

Podedes acceder aos retos que tiveron que resolver nestas imaxes:

Como vedes, están aprendendo moitas cousas sobre o Camiño de Santiago e todo o que o rodea.

Ata a próxima aventura lectora!

Frailiño

AS MOCHILAS VIAXEIRAS CHEGAN A INFANTIL

Bo día, superlectores!

Esta semana, a aventura das mochilas viaxeiras, chega tamén a Educación Infantil. Cóntase con tres mochilas diferentes, unha para cada curso da etapa, que se irán rotando entre o alumnado da mesma idade.

Esperamos que a selección realizada sexa do voso interese e que desfrutedes moito deste material entre toda a familia.

COMEZA A AVENTURA DAS MOCHILAS VIAXEIRAS

Bo día, superlectores!

Hoxe comparto con vós unha das novidades deste curso. Comezaron a viaxar cara os vosos fogares unhas mochilas viaxeiras, para a etapa de Educación Primaria. Estas mochilas permitirán levar libros á casa para compartilos coa familia. Na mochila van materiais diversos, pensando nos diferentes intereses. Hai moitas posibilidades e en diferentes idiomas (galego, castelán e inglés): libros de emocións, de manualidades, de poesía, cómics, revistas ou xogos de preguntas.

Estas mochilas estarán uns días no voso fogar, para que poidades desfrutar dela. Agardamos que resulte unha experiencia lectora moi positiva!

 

NOVIDADES DE XANEIRO

 Bo día, superlectores!

Aquí podedes ver as novidades máis recentes chegadas á biblioteca.

Para  Educación Infantil e o primeiro ciclo de primaria dispoñemos dalgún álbum ilustrado novo como Non é unha caixa, é unha cidade.

Para o segundo e terceiro ciclo de primaria, dispoñedes dos primeiros títulos da colección Los cazamisterios ou a nova edición do xornal en galego O Papagaio.

Achegádevos á biblioteca para desfrutar das novas adquisicións!

 O rato Frailiño

VISITA DE PACO NOGUEIRAS

Bo día, superlectores de Sobrado!

Levamos xa uns días de volta no cole e xa comezamos a facer actividades dende a biblioteca. Hoxe contamos coa visita de Paco Nogueiras. Durante a súa visita, musicou contos moi relacionados coas cores e a natureza. Escoitamos contos como:

- Flores, un novo título da colección “Do berce á lúa”.

- Unha eiruga moi larpeira, que  amosa a metamorfose dun verme ata convertirse nunha fermosa bolboreta. 

- Non é unha caixa, é unha cidade.

- O coelliño branco.

- A banda que ninguén coñece.

- Grande e pequena, XVIII Premio Internacional Compostela de Álbum Ilustrado.

Foi unha hora chea de moito ritmo e risas, entre as versións cantadas destes contos.

ESTAMOS DE VOLTA!

 Bo día, superlectores!

Estamos de volta, pensando novas actividades para facer na nosa biblioteca. A próxima semana teremos unha visita moi especial. Estade atentos/as ás novidades!!

O rato Frailiño